無聲 – sowhatmovie 影評 EP4

· 17-11-2020 · Comments are off

無聲 – sowhatmovie 影評 EP4:無聲的痛
.
失聰少年張誠(劉子銓)轉到啟聰學校就讀,遇上心儀嘅女同學貝貝(陳姸霏)。有日,佢發現校車最後一排,貝貝被人強迫「玩遊戲」,對於聾人學校嘅黑暗感到非常恐懼。面對學長小光(金玄彬)喺學校長期霸凌,漸漸成為下個欺凌目標嘅佢決定拉貝貝去搵老師(劉冠廷)幫手。與此同時,加害者與受害者嘅界線慢慢變得模糊⋯⋯
.
餘韻很重,久未釋懷,係會令人返到屋企都不斷回想嘅作品。加上飾演學生嘅新演員演技過於出色,成件事好有說服力,睇到有點難受。
劉子銓 、陳姸霏、金玄彬呢三個名我會好好記住。有一吓懷疑過係咪真係搵聽障人士嚟演,深信三位背後苦功下了不少。
金玄彬受害者加害者嘅心理矛盾演得甚具張力,演出兩種唔同嘅病態心理。非常喜歡天台一場戲,好安靜,金玄彬同劉冠廷,一場學生對老師嘅剖白。金玄彬竭力嗌出嚟嘅嚎哭聲,足以憾動每個觀眾嘅內心,呢個角色承受嘅痛,比其他學生仲要多。十分喜歡佢嘅表演,金馬男配當之亦無愧!去到電影中尾段仲覺得,佢先係男主角(喂。
.
如果無劉冠廷飾演嘅王老師,如果無真係為學生著想嘅心,學生永永遠遠都走唔出呢個地獄輪迴,更莫講話要喺傷痛中復原。所有老師睇到學生受罪理應都係切膚之痛,又何以有包庇同事、以校譽為重之說?嗰啲人渣應該拎去打靶!(激
罪責每個人都有:施暴者加害、同行者助紂為虐、受害者隱瞞甚至加害下一個受害者、學校掩飾事實、社會對聽障人士不接納⋯⋯大道理係人都知,但又有幾多人做到?黑暗啲諗,人類真係集萬惡於一身,仲要呢個係強者永遠剝削弱者嘅世界,不如地球毁滅打個和就算。
.
完場有位觀眾大爆喊
一起玩   
頂個手語勁洗腦

 

無聲