顫.役.前 – 靈光影評 EP7

· 02-10-2020 · Comments are off

顫.役.前 – 靈光影評 EP7:唔知係咪睇得太多類似嘅電影,當《顫.役.前》嘅終極謎底揭開嘅時候,我好冷靜:「哦,又係扭呢條橋。」事前我確實畀預告片誤導咗我嘅思考方向,不過《顫.役.前》扭完橋之後,劇情犯駁位唔少,又太刻意想表達政治正確嘅意識形態,可惜表達手法唔夠高明,忽略咗劇情嘅深度。《顫.役.前》就好似係《訪.嚇》嘅變奏,但係後者實在好睇好多。

 

前面太冗長

《顫.役.前》頭1/3部分雖然慢咗少少,但總算叫做引人入勝,畫面拍得幾靚,善用光暗、對稱同空間比例,睇落去好似都唔錯。緊接嘅1/3交代咗另外一件事、另外一種氣氛,但係劇情推進又係太冗長,甚至乎比前一段更加欠缺劇情張力,睇唔出到底有咩實際意義嘅瑣碎事情不斷發生。感覺導演只係想話畀觀眾知「我喺 Act 2 埋咗好多線索」,可惜拖得太耐,做咩都已經跌晒 watt。

 

後面太刻意

到咗扭橋嘅時間,一扭,期望電影可以漸入佳景,會有好多奇妙嘅事情發生,點知,事情呢,一時就滑稽,一時就好唔合理,跳脫得滯,充斥「之前明明唔可以咁⋯⋯點解而家又可以咁」、「既然都已經做咗A⋯⋯點解又唔做埋B」等等嘅疑問,難以理解同相信主角連番令人無言嘅錯誤決定。《顫.役.前》結局畫公仔畫到出晒腸,過分執意要營造「白人好邪惡」同「黑人要反抗」嘅意象,一招令劇情同人物完全失去晒內涵。

 

靠演員撐住

好彩女主角 Janelle Monáe 嘅演出投入,
一眾配角都好落力,為《顫.役.前》呢個敘事乏味嘅故事注入能量。我唔肯定係咪稍為郁一郁劇情次序,就可以令《顫.役.前》有返少少爽快嘅節奏,不過呢部電影嘅致命傷始終係坦蕩得太過刻意嘅結局,做唔到《訪.嚇》嗰種無孔不入嘅驚悚同埋巧妙嘅隱喻。

 

顫.役.前