那夜凌晨,我老公死極死唔去 – 靈光影評 EP15

· 08-11-2020 · Comments are off

那夜凌晨,我老公死極死唔去 – 靈光影評 EP15:爛又未爛得透,cult 又未cult 得晒,《那夜凌晨,我老公死極死唔去》希望營造奇趣兼騎呢嘅氣氛,一開始都 OK 嘅,不過越做就越唔對路。雖然有陣時係幾輕鬆幾好笑,但係大部分嘅笑位其實都非常 old school,完全估到晒編劇想點玩。至於結局,係一個挖得極深嘅坑,而且編劇好似諗都無諗過要填返個坑,咁樣就出晒事啦。

 

唔夠爛又唔夠cult

一睇《那夜凌晨,我老公死極死唔去》呢個戲名,就知道電影故事擺明係要玩嘢,弊在又玩得唔夠盡慶。故事裡面有外星人,有愛情元素,有少少懸疑情節,最後竟然出動埋超級英雄式嘅動作場面。東拼西湊、大雜燴劇情鋪排可圈可點,可惜無邊一樣嘢真係到肉,特別係男女主角嘅愛情故事有頭無尾,女主角「殺夫」方法單調乏味,劇情亦都無乜涵養。

 

笑又唔係特別好笑

今次李貞賢嘅純情老婆角色比起佢喺《屍殺半島》裡面嘅黑面媽媽角色好睇,幾趣致,相反其他演員就演得好一般,仲有啲過分 stereotype。一部喜劇,過分 stereotype 嘅角色同太過易估嘅笑位並唔係下下都 work。電影其中「浴室放電」一場戲,同一個笑點重用再重用,再加上唔係特別好笑嘅關係,氣氛自然變得相當尷尬。值得一提嘅係,大家都演得好差。

 

又係敗响結局

《那夜凌晨,我老公死極死唔去》結局突然走諜戰片套路,甚至乎有殲滅外星人嘅組織登場,認真打鬥,突然唔再搞笑,完全變咗做另一部電影,唔知想點。有關外星人嘅新資訊訊息量龐大,睇到觀眾一頭霧水⋯⋯另外,roll credit 前嘅最後一幕真係老土到令人窒息,可能連現世代嘅鄉土劇都已經唔敢再拍呢一種尷尬到想喊嘅結局⋯⋯(credit 中間嘅真.最後一幕係幾聰明嘅,不過就將呢部電影嘅坑挖得更加深⋯⋯)

 

那夜凌晨,我老公死極死唔去