無定向喪心老友記 – 靈光影評 EP1

· 02-10-2020 · Comments are off

無定向喪心老友記 – 靈光影評 EP1:《無定向喪心老友記》係2019年阿根廷本土火紅火熱嘅作品。睇完戲先知佢係翻拍1976年阿根廷出戰奧斯卡但係最後無入圍「最佳外語片」嘅一部 cult 片《Yesterday’s Guys Used No Arsenic》(《無定向喪心老友記》命運相同),都係講一個過氣女星想賣走佢間古老大屋,繼而影響到三位同屋老友嘅命運。今次故事四個主角嘅定位分別係「影后」、「影后」嘅「綠葉」老公同埋一手提攜「影后」成名嘅「導演」、「編劇」,成部戲嘅對白都幾乎同拍電影、電影行業有關,自認係戲迷嘅觀眾一定可以從中搵到唔少樂趣。

 

主角人設勁有心思

《無定向喪心老友記》一開場就精心為觀眾交代四個主角嘅定位,而且係同佢哋嘅職業有密切關係:「影后」被困於昔日成功嘅夢幻,「綠葉」則睇唔透自己只喺追求緊一場夢幻;「編劇」一直等候願者上釣,「導演」則係一個會主動出擊嘅猛人。唔怕分唔清四個主角邊個打邊個,性格非常鮮明,反而兩個想呃「影后」賣走大屋嘅「奸角」唔夠突出。「女奸角」只係因為出場時間多所以比較有存在感,「男奸角」直頭係流流哋。有可能係想「奸角」望落上比較弱雞,切合電影嘅主題:呢兩個掠奪者奸極都只係鼠輩,唔好以為鬥得過真正嘅「好戲之人」。

 

有定向抑或無定向

《無定向喪心老友記》呢個譯名擺明係想食幾年前《無定向喪心病狂》嘅氣勢。我覺得《無定向喪心老友記》唔算好癲,最多只係人設騎呢,搵唔到有《無定向喪心病狂》裡面啲 twist 會嚇到你彈起嘅瘋狂。《無定向喪心老友記》嘲諷電影或者電影業界裡面有諸多嘅 cliche,而成部電影其實都係一場 cliche,劇情「有定向」而非「無定向」,不過導演有善用場面調度去誤導觀眾,有幾幕我都俾畫面唔自然嘅空間感呃到,以為會有啲咩驚嚇嘅事情發生。

 

一切都係按照導演編劇嘅旨意行事

「影后」過晒氣,一直困住自己喺昔日嘅黃金年代,而佢間古老大屋就係呢個黃金年代嘅象徵,華麗,但係已經遠離現實,同時影射演藝圈封閉又封建嘅制度。《無定向喪心老友記》大概係想講一場電影界嘅世代之爭,新世代想踩住舊世代上位,卻鬥唔過機關算盡嘅舊世代「導演」同「編劇」。拍戲嘛,正路就梗係跟住「導演」同「編劇」嘅節奏,不過跟得太貼嘅話,只會淪落成為扯線公仔。「影后」昔日之所以咁成功,係因為佢有個人特色,又識得自己話事,「導演」同「編劇」都只係負責喺佢背後推佢上神台;今時今日「影后」俾新世代利用,一直愛錫(係愛定係責任定係一己私利?)「影后」嘅「導演」同「編劇」於是出手。鼠輩以為自己可以話事,唔覺唔覺竟然變咗做「導演」同「編劇」操控之下嘅「奸角」,而「奸角」喺大多數電影裡面都係無好下場,一個圈套緊扣一個圈套,種種角色關係真係寫得妙絕。

 

故事還好不過對白字字珠璣

人設同角色之間嘅角力關係幾特別,但係劇情又唔係話好有新意,最尾真係變咗有好多刻意堆砌出嚟嘅 cliche;反而喺劇情之上,角色對白有勁多可以細味嘅地方,而且真心幽默,尤其係串爆演藝人士自我感覺良好同埋潛規則處處嘅金句真係好正,其中一句「只要無人見到,就唔會有醜聞」簡直係一絕。《無定向喪心老友記》最後一場戲完全係 cliche 嘅極致,雖然又係為咗配合主題,但係我嫌太 cliche,加上有啲唔合理(不過南美國家嘅嘢呢真係好難講),停喺前一場戲失驚無神 black out 就啱我口味多啲。

 

無定向喪心老友記