決戰非常外公 – 靈光影評 EP13

· 28-10-2020 · Comments are off

決戰非常外公 – 靈光影評 EP13:改編自同名小說《The War With Grandpa》嘅《決戰非常外公》演員陣容原來好勁,不過一發現電影裡面有「聖誕節」元素,就聞到一陣燶味。同睇絕大部分有「聖誕節」元素嘅家庭喜劇電影無咩分別,輕鬆下、笑下就好,唔好期待有出色嘅劇情,亦都唔好期待影帝有影帝級嘅演出。

 

劇情非常鬆散

先唔講好笑定唔好笑,《決戰非常外公》嘅劇情段落鬆散,一開始好強調「外公」Robert De Niro 極度唔願意搬去同「阿女」Uma Thurman 嘅一家五口同居,可惜,之後根本上無任何劇情反映到 Robert De Niro 對上述處境感到難過或者厭惡;「大戰」雖然一浪接一浪,但係關聯性奇弱,就算喺「戰」與「戰」之間不斷穿插人生大道理,都表達唔出電影嘅中心思想。

 

老頑童VS人細鬼大

至於,真係要講好笑定唔好笑嘅話,我個人就認為,的確係有好笑嘅地方,尤其係當一班老頑童組隊決戰人細鬼大嘅小學生,佢哋嘅小學雞對話同行為都算叫做有返咁上下娛樂性嘅。不過《決戰非常外公》裡面好多角色都欠缺有內涵嘅人物刻劃,例如係幾位有出場等於無出場嘅小學生配角,而「阿女」嘅「老公」仲慘,明明有個畀佢大翻身嘅黃金機會,最後竟然無疾而終。笑得出還笑得出,都要認真諗下點樣寫好啲個劇本架構先得㗎。

 

決戰非常外公