末世綠洲 – 靈光影評 EP8

· 02-10-2020 · Comments are off

末世綠洲 – 靈光影評 EP8:「嘩,災難片120分鐘咁長?」呢個係我知道《末世綠洲》片長嘅即時反應。唔係唔畀災難片長過兩粒鐘,只不過,咁樣都幾考導演嘅功力。Gerard Butler 同導演 Ric Roman Waugh 上一次合作嘅《白宮淪陷3:天使淪陷》直頭可以做動作片嘅反面教材,而今次嘅《末世綠洲》,至少比《白宮淪陷3》有進步。

 

公式化與非公式化之間

假如你一心諗住追求連場爆炸同埋大規模破壞嘅緊張刺激,《末世綠洲》就完全唔會啱你。 《末世綠洲》偏離傳統災難片路線,刻劃災難發生/正要準備發生前人類種種嘅失控行為為主,真正嘅災難場面為次。貌似非主流,實際上有好多商業嘅計算,好多劇情都係照單執藥。主角一家三口一路上輪住咁遇到善良、絕望、趁火打劫、失心瘋、冷漠、看透世事等等嘅過客,一層一層推爆觀眾嘅情緒。你好難否定主角喺天災呢啲咁特殊嘅情況之下唔會遇到連串奇人怪事,加上劇本結構其實寫得唔差,而且都幾工整,即使《末世綠洲》只係「呢度加啲嗰度又加啲」嘅「大雜燴」都好,拍出嚟嘅感覺我又覺得唔算差喎。

 

災難片就係咁㗎啦

《末世綠洲》不斷強調男女主角(兩夫婦)有感情危機呢個 point 就顯得無無謂謂。想唱患難下破鏡重圓呢支歌仔,但係甚少講得出男女主角嘅感情問題對個故事有幾大衝擊。其實男女主角被設定為一對恩愛夫婦都照行得通,好多災難片都講主角失散後(特別係為咗仔女所以)好緊張要嚟個大團圓/為親情而犧牲,根本係災難片嘅基本元素,甚至乎係人之常情。《末世綠洲》仲有好多畫蛇添足不過又無傷大雅嘅地方,以上只係其中一個。

 

短啲會好睇啲

據聞最初劇本有多啲災難場面,可能拍嘅時候無乜 budget 所以畀人 cut 走晒?都好嘅,回歸基本步,叫演員認真做好啲戲。相反,其實導演都可以考慮 cut 短啲部戲,cut 走啲無乜意思嘅空鏡,某啲情節亦唔需要拍得太長。災難片嘛,步伐急少少都係應該嘅。

 

又嚟講講戰狼嘅演技

Gerard Butler 演技都仲係十年如一日,不過今次《末世綠洲》畀佢發揮內心戲嘅空間都幾大,可以畀佢爆發好多情緒,好過一直做《白宮淪陷》系列裡面完全無靈魂嘅總統保鏢角色,美中不足之處係劇本無深入講佢點樣面對佢嘅罪疚。Gerard Butler 亦都做得好過佢對上一部擔正嘅災難片《人造天劫》㗎啦⋯⋯咦?一年都唔係話有好多部災難片啫,而家係咪唔搵 The Rock 就會搵 Gerard Butler 做災難片男主角呢?

 

靈光幻影