新聞守護者 – 靈光影評 EP11

· 17-10-2020 · Comments are off

新聞守護者 – 靈光影評 EP11:電影《新聞守護者》改編自真人真事,主要描寫上世紀30年代記者 Gareth Jones 為咗追查真相潛入烏克蘭,從而揭發蘇聯惡行,最後帶出 George Orwell 創作《動物農莊》背後嘅意義。電影喺敘事同節奏上嘅拿捏有少少失衡,不過故事信息相當強烈,令人感受深刻。幾位配角例如係出爐威尼斯影后 Vanessa Kirby 同 Peter Sarsgaard 都比男主角 James Norton 搶鏡,James Norton 嘅演出就不過不失。

 

男主角一人之旅

《新聞守護者》既係 Gareth Jones 嘅尋找真相之旅,亦都係佢嘅重訪故地之旅,對佢有雙重意義。電影花咗唔少篇幅講 Gareth Jones 出發前往莫斯科搵官媒穿針引線嘅經過。雖然一路上所見所聞對故事嘅中心思想好重要,但係感覺上鋪排咗好耐都仲未正式踏入正題。當講到 Gareth Jones 喺烏克蘭一個小鎮發現各種殘酷真相嘅時候,劇情同畫面就開始變得震撼,成功營造出令人不安同心寒嘅氣氛。睇見幕幕生靈塗碳,千瘡百孔,都幾唔舒服。講起唔舒服,要順帶一提,電影嘅鏡頭搖得都幾頻密⋯⋯

 

動物農莊

《新聞守護者》嘗試穿插《動物農莊》嘅文字內容以對比電影劇情。《動物農莊》呢本經典小說確實同《新聞守護者》裡面嘅歷史事實密不可分,只可惜電影就唔係咁表達到兩者之間有緊密嘅關係。George Orwell 一開始嘅出場突兀,而且明顯扮演緊旁白嘅角色,同 Gareth Jones 嘅主線劇情疏離;到後來 Gareth Jones 同 George Orwell 見面嘅部分,貌似會為電影劇情帶嚟新發展,原來只得曇花一現,搞到有少少兩頭唔到岸嘅感覺。(而結局亦有啲匆忙

 

新聞嘅價值

香港觀眾喺呢個社會氣候睇《新聞守護者》,感受一定會好深。真相當然可以越辨越明,但係極權者總係有好多方法去毁滅證據;毁滅唔到,就會指鹿為馬,操控官媒,直接無視平民百姓嘅智商,平民百姓只好靠正義嘅新聞從業員鍥而不捨、奮不顧身去報導極權者唔想畀大家深入了解嘅真相。Gareth Jones 嘅勇氣非一般人能及,但係至少我哋可以銘記佢嘅精神,向佢致敬。

 

新聞守護者