我的豪爸爸 – 靈光影評 EP9

· 09-10-2020 · Comments are off

我的豪爸爸 – 靈光影評 EP9:《我的豪爸爸》無刻意嘅歌頌,反而幾真情流露,主角可以明示網絡封鎖會硬生生咁扼殺創作自由同空間。「想創新?去香港啦!」去香港,不過係2018年或之前嘅香港,要知道《我的豪爸爸》早响2018年喺香港同深圳取景;今日,關於香港嘅自由同空間,唔同人都換咗唔同嘅睇法。


咁樣係咪stereotype

吳耀漢飾演一個喺中國開玩具廠嘅有錢老豆,脾氣大、橫蠻專制、多情⋯⋯《我的豪爸爸》將佢塑造成為一個好似清朝皇帝咁款嘅極權霸者,不期然會令觀眾聯想起中國土豪新常態。係咪 stereotype 就見仁見智,不過亦都可以話係對社會現狀一種誇張嘅表述。反而女主角嘅設定無我開頭想像嘅「廢」,性格出奇地討好,唔係一個無所事事只係識得揮霍嘅富二代,有頭有腦,加分。

 

荷里活亞洲熱未退

自從《我的超豪男友》爆紅之後,講東西文化差異嘅喜劇電影就好似成為咗荷里活嘅新竉兒,令 Awkafina 稱后嘅《別告訴她》就係其中之一。相對之下,《我的豪爸爸》故事比較簡單,無勁爆嘅富豪生活,亦都無悲從中來嘅生離死別,女主角被迫返中國處理家族生意,同關係疏遠嘅老豆一時啱傾,一時唔啱 key,劇情有些少肥皂劇嘅味道,不過又幾襟睇,唔會話老土到會令觀眾側目。唯一比較明顯嘅問題係絕大部分角色都傾向用對白表達情感,少咗啲幻想嘅空間,演出上亦略嫌浮誇。

 

始終係美籍華裔style

雖然有香港人熟悉嘅演員同埋廣東話,不過《我的豪爸爸》底子裡始終係一部東西混雜嘅製作,有某啲時候難免會令香港觀眾感到唔夠自然。女主角嘅故事係導演 Emily Ting 嘅人生寫照。Emily Ting 其實係嚟自台灣嘅美國移民,而電影裡面飾演吳耀漢(講英文流利過講廣東話而住喺深圳嘅)細仔嘅小演員原來係 Emily Ting 細佬,再加上電影又無特別交代吳耀漢到底係廣東人抑或係上深圳發展嘅香港人,戲裡戲外都充滿著各種文化差異。外國觀眾唔會「分那麼細」,或者根本就分唔到,但係正常香港觀眾好難會忽略呢啲細節。《我的豪爸爸》整體上畀我嘅感覺就好似我去咗大陸見到我一班住喺美國嘅親戚一樣。

 

我的豪爸爸