不死軍團 – 靈光影評 EP2

· 02-10-2020 · Comments are off

不死軍團 – 靈光影評 EP2:香港戲院唔知幾時先至可以開返,而就算開返,大家期待已久嘅2020年猛片都已經(再一次)delay 到2021年上映,真係勁慘。結果最近熱話去咗 Netflix 嘅全新漫畫改編並且由 Charlize Theron 擔正嘅動作電影《不死軍團》身上。《不死軍團》人設同哲學觀唔錯,最正當然就係睇 Charlize Theron,可惜電影劇情同節奏只係不過不失。講咗好多主要角色之間嘅關係同命運,但係同今次主線劇情唔掛勾,成部戲十足十係為咗拍續集而鋪路嘅導讀。

 

見慣見熟嘅劇情

《不死軍團》主線劇情似曾相識,邪惡藥廠老闆要捉不死人做實驗,過程同結局係點,估都估得到,好在幾位不死人主角嘅背景故事夠吸引力。唯一真係唔滿意新血 Nile 加盟不死人小隊嘅副線劇情,老土得滯,唔可以被忽視嘅犯駁位又勁多,飾演 Nile 嘅新演員 Kiki Layne 好似由《神探俏嬌娃》走咗入《變種特攻》一樣,表現實在有待改進。

 

節奏唔夠爽快

比起一般奇幻動作電影,《不死軍團》嘅打鬥場面唔算多,不過就無夾硬嚟同核突到喊嘅 CG,夠順眼。文戲方面唔難睇,只係覺得活力不足,可能想交代嘅嘢太多,有啲累贅,到 Act 2 先開始好返少少,要等到 Act 3 先至出現返正常動作電影應有嘅爽快節奏。始終喺屋企睇戲,聲畫質素欠奉,可能喺大銀幕面前睇《不死軍團》嘅觀影體驗會唔一樣。

 

都係睇女神影后

女主角 Charlize Theron 絕對百看不厭(佢係我中意嘅幾位女演員之一),型到爆,多得有佢為《不死軍團》加返唔少分數。同樣係比較中性嘅角色,Charlize Theron 今次飾演嘅 Andy 無《Mad Max》嘅 Furiosa 咁進擊,可能因為已經生存咗超過一千年嘅關係,性格冷靜同有睿智多好多。我自己就幾中意 Andy 呢個角色。

 

不死人嘅快樂與痛苦

除咗 Andy 同 Nile,仲有 Booker、Joe 同 Nicky 呢三個不死嘅男人,對不死之身有著唔同嘅理解同體驗。我覺得《不死軍團》最精彩嘅地方係不死人之間嘅情誼。每當不死人小隊「全滅」,Andy 起返身之後一定會緊張問「係咪個個都無事」,超過數百年以上嘅感情真係一啲都唔簡單。當你認為無嘢係永恆嘅時候,可以望望 Joe 同 Nicky 嘅愛情;當你覺得擁有不死之身係一個詛咒嘅時候,可以望望 Andy 或者Booker 對於結束人生嘅不同見解。有咁多引子,結局又埋咗一條咁明顯嘅伏線,相信睇完《不死軍團》嘅觀眾都會對Andy 嘅「未了之事」大感興趣。

 

網絡世界好危險

Andy,知唔知喺電話「刪除」咗嘅相可以喺「最近刪除」到搵得返?續集不如認真諗諗點樣寫好啲網絡監控對幾位不死人存在嘅威脅?《不死軍團》整體普普通通,但係就幫續集起咗一個好靚嘅 setting,期望續集可以拍得更加有趣同有 style。

 

不死軍團