靚太軍樂團 – 正仔影評 EP4

· 14-11-2020 · Comments are off

靚太軍樂團 – 正仔影評 EP4:電影所圍繞嘅係一群平時較少被提及,光輝背後嘅軍人妻子。喺長期承受巨大心理負擔嘅情況下,故事中嘅一班軍嫂用音樂去消磨時間,同時透過歌聲暫時脫離現實苦悶、孤獨嘅生活。

 

戲中嘅歌曲都算唔錯,電影走一個英式小幽默嘅路線,配合多個形象鮮明嘅角色。只係角色寫得唔夠立體,過程中發生嘅幾件小插曲都同主線或者人物成長無咩大關係。如是者電影未能做到應有嘅輕鬆娛樂,亦無法激動人心。大概係因為想寫實交代,變成包羅萬有下,主題就會被模糊化、被分支化左。電影更似係想記錄、紀念依類團體,藉此側面歌頌感激軍隊。配合今個星期嘅Remembrance Day上映,可謂天衣無縫。

 

故事由兩個女主角之間嘅分歧所引領,從爭鬥、妥協,以至惺惺相惜,都喺樂團訓練中一一爆發。兩名女主角嘅設定看似可大造文章,從而引申到兩套價值觀嘅碰撞,又可加深觀眾對角色嘅關懷。但劇本運用得相當片面求其,以上所述嘅轉化、過渡都唔太清楚。兩者關係一直反反覆覆,最終只靠鬧一場遲來的交去解決,令人失望。

 

另外本應作為故事重點嘅訓練過程,亦無法發揮應有嘅作用。正常黎講團員喺訓練過程中開始時會有諸多拗撬衝突,後來一同經歷某些事件後加深認識了解,從溝通中建立信任,一路成長,團員之間互相扶持。最終令一班水準不高嘅烏合之眾可以登上舞台表演,縱然實力不足但靠心思意念以及創意,貢獻雖不偉大但激勵人心嘅演出。但本戲中一切事件都只係過過場,而且進步過程消失左。合唱團係唔知點樣練練下就由噪音變得動聽,最尾更神奇地只用一程車嘅時間就練好上台表演嘅劇目,絕對令人驚嘆。所表演嘅歌雖為以家書寫成,心思爆燈,亦甚有意義。但究竟如何呼應戲中所提,唱出軍嫂們嘅心聲,就似是言過其實了。

 

靚太軍樂團