我們的女巫手冊 – 正仔影評 EP2

· 08-11-2020 · Comments are off

我們的女巫手冊 – 正仔影評 EP2:Blumhouse 又一政治寓言。電影一開頭就係標準嘅青少年成長故事:主角因為搬家而要面對新環境,又要會見新家人,適應上顯得有點無所適從。好快就認識到幾位好姊妹,然後就一齊修煉巫術,WHAT?OK,都想知佢今次個設定玩咩。過程中建立感情,整蠱/報復班上惡霸,發展愛情線等等。前中段輕鬆嘅情節都尚算不錯,除左傷煉過程有點兒太輕易太順利外,目前為止依然係同類型故事嘅格局。

 

然而,故事同時開始出現暗湧。關於性別議題嘅話題上刻意嘅政治正確突兀得令人發笑;曾以為係故事中最重要嘅姊妹情,以及巫術在愛情面前原來都只是不堪一擊。中段開始似乎甚至想將前段所塑造,較為輕鬆嘅女巫背景作廢,先醒起忽略左包括繼父同繼兄弟嘅新家人,甚至與母親嘅互動關係。擺設般嘅家人此時透過一餐晚飯場口回歸,取而代之嘅係“消失“掉角色設定空泛嘅“姊妹們“。而該幕煞有介事嘅老派鏡頭焦點深淺轉換手法更係相當礙眼。

 

接下來嘅發展更係慘不忍睹。一個個喺後續無follow up嘅震撼彈不斷冒出,不及吐糟時,大量角色連最基本嘅設定都蒼白得叫人看得雲裡霧裡。實在好難明白導演編劇諗緊咩,就連最後對boss 嘅戰鬥無論意義上、手法上、呈現上都係合格線以下嘅遠處。如果要簡言電影嘅真正主題,其實只係描述主角一個作為有“能力“嘅女性身處男性父權社會下嘅被擺佈,與及再一次呼喚女性應站起來同心對抗嘅小學雞論調式政治申述。

 

戲中演員演技一般,主角更係無法支撐場面。縱然出現中二病嘅“風火水土“屬性魔法,電腦特技還算可以(??)。美術風格、音樂不見突出。縱觀整套電影,故事古怪之處奇多,劇情推進手法拙劣。<The Craft: Legacy>係一套以巫術包裝,又一次消費女權嘅主題下,而誕生嘅另一部荒謬cult 片。有影評提到最尾一段嘅boss戰與同為Blumhouse 出品嘅<Black Christmas>有相似之處,但整體水準始終令我聯想起另一部怪誕經典 - <The Room>。

 

我們的女巫手冊