屠.姐上錯身 – 正仔影評 EP5

· 14-11-2020 · Comments are off

屠.姐上錯身 – 正仔影評 EP5:電影開頭所展現嘅無敵殺手氣質係標準驚慄片嘅配置,虐殺嘅方式都幾有創意,驟眼睇都有d cult 味,不好此道者可能無法接受。事實上<Freaky>作為一套血腥變態得黎又帶點趣味嘅三級電影,卻更讓我想起日本國民老婆新垣結衣多年前嘅經典日劇<父女七日變>。

 

同樣係由一位大叔同高中少女交換靈魂,分別在於今次唔係要代入對方身分從而加深認識,而係一場貓捉老鼠嘅追逐戰。大叔扮少女嘅反差萌本應是重要看點,主角Vince Vaughn有不俗嘅嘗試但效果依然低於預期;而女主角Kathryn Newton則變成一個板起臉嘅機械人。最大原因在於女主角定位唔鮮明,性格習慣都平凡得毫無特色,單靠一頭金髮實在難以叫人(男主角)模仿,亦難以讓女主角喺兩段演繹中從黑口黑面殺氣騰騰嘅連續殺人犯區分出高中少女嘅身份。另外故事中嘅經歷亦無法令女主角自身有咩成長得著,除左流水作業式嘅瘋狂追逐外就已無法有更深層次可供討論,白白令與喪父有關嘅家庭關係伏線只成為一條無意義嘅註腳。結局更意外地爛尾,封殺左觀眾嘅幻想空間,亦絕左拍續集嘅後路。

 

交換身體嘅電影電視劇其實屢見不鮮,近年較出色嘅佳作就有<你的名字>,日劇<民王>等,就連同為Blumhouse 作品嘅<Happy Death Day 2U>都係一例。通常都係爆笑級,如有心思者更會令人感動落淚。<Freaky>縱然無法做到以上效果,憑著暴力衝擊畫面同埋滿佈嘅笑點都足以做到無冷場,足矣。

 

屠.姐上錯身