奪命守門人 – 正仔影評 EP1

· 28-10-2020 · Comments are off

奪命守門人 – 正仔影評 EP1:<The Doorman>係一套爛得好可愛,可愛得唔忍心去鬧嘅戲。但作為專業(批)評爛片戶,我係十分樂意去吐糟依套戲嘅。打從第一段開始就見到女主角英氣十足嘅造型同時不自然嘅五官,而生硬嘅仲有佢嘅演技。故事中例牌遭受打擊嘅無敵主角設定令人諗起唔少陽剛味十足嘅動作片,同樣地都係動作爆炸場面勝於一切,亦同樣地喺演技同劇情上都叫人無法認真。

 

其實唔單止主角,基本上整套戲嘅演員都有依個問題,就連近年少見嘅Jean Reno都相當麻麻。另一個彩蛋式登場嘅仲有當年嘅"海猿"伊藤英明,電影中飾演一個幾乎無對白嘅角色。明顯地語言上嘅限制不少,而且今次演出又無咩亮點。只怕同導演一樣,進入荷里活嘅前景堪虞。

 

但以上都無法掩飾荒謬絕倫嘅劇本,對白、情緒全都唔合理,又要加入大量錯綜複雜嘅關係 。而且犯上大忌,唔單止用說話取代演戲解釋劇情,竟然直接用google,真係頂佢唔順。每一段嘅吐糟點都奇多,就例如女主角身任住宅大廈中一個無需要又無意義嘅Doorman設定,都只係用左五分鐘就又已經消失殆盡。又例如,女主角忽然同姐夫一家相認,轉頭就表示曾有一段不倫關係,然後,就無然後。沙石之多,叫人側目。

 

其實簡簡單單專心做番困獸鬥式與匪徒鬥智鬥力就已經好足夠,有著荷里活大片嘅模式但偏偏搞到成件事咁唔make sense,都算係奇蹟。要喺漏洞滿佈嘅劇本中根本無法談起角色塑造,甚至當作爆谷片都只能引來一片恥笑聲。如果只討論作為重頭戲嘅動作場面,不多嘅片段中都有個較為特別嘅旋轉鏡頭,但整體上剪得太零碎,動作設計亦只算一般。而死亡畫面處理上嘅避重就輕放喺同類型電影中,效果出到黎又變得好搞笑好cult。實在唔清楚應如何定位同埋以咩角度觀賞。

 

奪命守門人